Wood Land School : 

Kahatenhstánion tsi na’tetiatere ne Iotohrkó:wa tánon Iotohrha

Tsi  niióhsere’s  ne 2017  SBC Gallery of Contemporary Art  ó:ia  enhskonwahsèn:non, Wood Land School  tsi  enwahtentiá:tonke.   Tho ki’ ní:iot  tsi  ionkwahtharákwen  tánon  iaiakwatahsónteren   ne  atenro’será:se  aontahón:ne.  Ne Onkwehón:we  tsi  ahontáthawe  skátne  tsi  aiakwatiá:taren  ne  aiakwakwatá:ko  oh  nahó:ten kahétkentha  raotirihwa’shón:a iakwaiénteres tánon  skátne  tsi  aontaiakwatèn:rohwe.   Tsi  niióhsere’s  eniakwé:ne’ste’  tsi  teniatióia’ke’  ne Wood Land School,  eniakwahá:tenhste’  ne Iotohrkó:wa tsi na’tetiátere ne Iotóhrha  ne  kaièn:tere’s  ne  ao’shatsténhsera,   tsi  nontaiawenhserón:ne , tánon  ne  aiakawehiahráhsten.   Ki  kahatènhston  iáh  tetiotáhsawen  tánon  iáh  tshieió:to’kte’   ne  skátne   aietewanonhtónnionhwe  tsi  nahó:ten  tá:we  ne  Onkwehón:we’  akorihwa’shón:’a.

 

Nón:wa  tsi  ní:io  tsi  í:we  ne  orihwa’shón:’a  ne  onkwe’tà:ke,  ne  kahá:wi  ne  karihwahséton  tánon  iáh  thé:non  karí:wa  ahonnón:ni  tánon  tahatí:rihte’  ne  Onkwehón:we  raoti’nikòn :ra  ne  kwah  tsi  naho’tén:shon.   Kí:ken  tsi  nontaiawenhserón:ne  wathonkará:wihs  ne  Wood Land  School  tsi  waterihwahtentia’tánion  aontahóntka’we  ne  wanonhtonnionhtsherí:io  tánon  kaio’ténhsera  ahontahshnié:non,  tánon  ne  ohwísta  aontaiakotswanón:na  ne  Onkwehón:we  akononhtonniónhtshera  khóni’  ne  ó:ia  naho’tén:shon  tsi  aonhtentiá:ton. Ki ne  iá:ia’k  niiohserá:ke  tsi  náhe  ne  Wood Land  School  nia’teiá:kon  ne  ronaterihwahtentiá:ton,  ronaterihwahserón:ni  tánon  tehatiié:na’s  naho’tén:shon  ahonterihwahténtia’te’.   Ratiièn:tere’s  ne  Onkwehón:we  akorihwa’shón:’a  tánon  tsi  kén:’en rón:ne’s raononhontsà:ke ne Canada  ne  ne tewaienté:ri  ne  Tiohtià:ke:   Ne ne Wood Land School kahatènhston ne Iotohrkó:wa tsi na’tetiátere ne Iotóhrha,  tsi  nón:we  ne  aonnonhtónnionke’  tsi  waterihwahserón:ni  tetsarónhkwen  akaienteré:’on  tsi  na’tetewáteron  naho’tén:shon  tekonttihánion  tánon  nahó:ten  tewáhawe  aietewahténtia’te.

 

Ki ne Wood Land School, tho  non  róntstha  ne  Onkwehón:we   akononhtonniónhtshera,  tho  non  weriáhsaien  tsi  róntstha  tsi  ahonné:ne’ste’   tánon  tsi  ahontéweienhste’.   Iáh  ne  tekahrhó:roks  tsi  na’eia’tó:ten  ne  Onkwehón:we.  Nek tsi  kakwenienhstahtsherá:kon  kaié:nas  tsi  niieweiennó:ten  tánon  tsi  ní:io  tsi  teiottenionhátie’  tsi  nahó:ten   ionkwahá:wi  tsi  ionkwahtentiá:ton   tsi  nonkwá  ne  tsi  nontaiawenhserón:ne  tánon  ne  orí:wase  tsi  í:we.

 

Ki  ne  Wood Land School  ne káhawe  aiontahónhsatate’  tsi  naho’tén:shon   tsi  niiá:wen’s  ne  nia’tewenhniserá:ke’  tetewatohétstha.  Wood Land School  ioterién:tare  ne  ronnenná:taienhs  ronte’niéntha  ne  tahonwatité:ni    tsi’k  nitiotierá:ton  ne  kén:thon   A’nowarà:ke  Kawé:note’.  Wood Land School  ne  káhsere  ne  anonhtonniónhtshera  á:iontste’,  ne  kaia’takwe’ní:io  tsi  na’eia’tó:ten.  Ne  ohén:ton  í:kate  tsi  na’tetewá:teron  tsi  tionkwehón:we,  tánon  tsi  tionkwehón:we  ne  káhawe  ne ohóntsa  tánon  ne  nahoténshon  iáh  ón:kwe  té:ken.   Akwé:kon  ne  teiakwahtháhrha  ne  ákte’  nonwéhshon,  tánon  ne  aonkwe’tà:ke  iakoio’ténion   aietewarihwahserón:ni   ne  karihwakwe’ní:io  ne  Ronnonkwehón:we.   Tsi  nahó:ten  enkarihwakwé:ni  ki  kaio’ténhsera  ón:kwe  eniontkáhtho  ne  kwah  tsi  nèn:we’.

 

Ne  tewanonhtónnions  oh  ní:iot  ne  anonhtonniónhtshera  á:iontste’  tánon  aiontéweienhste’  tentiátiehste’  tsi  na’teionttihánion  ne  Onkwehón:we  tánon  ne  ronnenná:taiens  rotiio’tátie  ne  tahonwatité:ni?   Oh  nahó:ten  kén:ton’s  ronnenná:taiens  rotiio’tátie   tahonwatité:ni  tsi  ronaterihwahtentiá:tion  ne  iáh  thahonaterién:tarake   ne  ao’shatsténhsera?   Oh  nahó:ten  kén:ton’s  ne  aiakehiá:rake  tsi  na’tetiátere  ne  aiakotétshen’?  Oh  ní:iot  ne  tewakwé:kon  ken’  naietewá:iere  tsi  nahó:ten  tá:we?

 

— Duane Linklater, Tanya Lukin Linklater and cheyanne turions with Walter Scott

 

January 2017

 

Tiohtià:ke/Montréal

 

translated to Mohawk by Hilda Nicholas